RICORDANDO ROSA 2023"
concorso di poesie e canzoni siciliane
sezione POESIE
A NACA
autore: Girolamo la Marca
A NACA C'era na nàca, cu du cordi, e na cupèrta di lana russa, ma nun ci piensu unna la vitti, forsi mi la sunnàvu, c'era na casa, cu lu furmientu jittatu ‘nterra, na staddra cu la mula, un carrèttu lassàtu fora spajiàtu. C'eranu, vièrtuli, cufìna, straulìddri, bummiliddra e quartàra. misi di latu E poi un cufilàru, sempri addrumàtu, un furnu a ligna ppi fari lu pani e ogni tantu lu spinciùni, na brascèra, un tancìnu, na maiddra, na coffa di paglia, cosi ca ora nun ci ni sunnu chjiùni. C'era un curtìgliu, quattru carùsi ca jucavanu cu du ligna, na vicchiareddra ca pigliàva lu suli e cu du buscia di fierru faciva na mantìglia. C'era ma matri, ca mi chiamava, ppi dàrimi n'uvicièddru ancòra callu, ca la gaddrina avìa picca ca l'avìa fitàtu, Pari a mia un suonnu, ammèci j'è sulu na finiscèddra raputa a l'annarrièri, d'ùnna si vidi sulu lu passatu. . |
LA CULLA C’era una culla con due corde e una coperta di lana rossa, non ricordo dove l’ho vista, forse solo sognata, c’era una casa ed il carretto lasciato fuori. C’erano bisacce, cesti di vimini, strumenti di trasporto di legno, contenitori in argilla per l’acqua grandi e piccoli. C’era la cucina a legna accesa, un braciere, uno scaldino, un setaccio, cose che non ci sono più. C’era un cortile, quattro ragazzi che giocavano con dei pezzetti di legno, una vecchietta che prendeva il sole e con due aghi di ferro faceva una mantellina di lana. C’era mia madre che mi chiamava per darmi un uovo appena fatto dalla gallina, Mi sembra un sogno, invece è solo una finestra aperta indietro nel tempo da dove si vede solo il passato.
|