U LATTI DA CRAPA

MEL VIZZI

 


 




U LATTI DA CRAPA

(Ovvero: a Prima Colazziòni)

Carusi du Domìla
ca sìti tutti bòni
   a fari i capricciùsi
a ur’e colazziòni…
   ca nun vi piàcia u latti
né u tipu di viscòtti…
…ccu vùi, co ci cummàtti ?
se ‘iti appress’e spòt  ?!!

E patti supra patti
i mammi ormai su cotti !
U figliu si nni sbàtti
pirchì a riclàmi è forti
…di tanti cosi spàtti
…di merendìni e torti !
“Mamà…pirchì ‘u’mm’accàtti” ??  
…E’ chissa a malasorti !!!
…ca si disprezza u latti !     
…cc’u pani, o cch’i viscòtti !


E a parti c’on ci sunnu cciù putìi…
Si ‘jìnginu i carrèlla di lurdìi…
Du latti, ‘un si canùscia cciù u sapùri…
E nun s’addràtta cciù…li criatùri !

Di cosi finti ormai abbùnna u munnu…
e i cosi veri…   sù lassàti ‘nfùnnu !

Carusi du Domìla
vi manca a ‘nfurmazziòni
di zòcch’ era ‘mpassàtu
…a Prima Colazziòni…
Lassàtivi  cuntàri
‘e tempi mìa com’era…
quann’è ca a colazziòni
spuntàva ‘a cantunèra…

Ogn’e matìna u scrùsciu di sunàgli
facìa affacciàri ‘e matri ccu li figli…
‘mmenzu la via ‘mpiggiàmi o cch’i vistàgli
ccu’ll’òcci ‘mpiccicàti e cch’i sbadìgli…

A festa era già accuminzàta
   cch’i crapi e i campanèddri ‘mmenz’a strata…
chiddra cciò sicca e chiddra cciò minnùta…
com’ i modelli a fari la sfilàta !

  E si spargìva u sciàvuru
…ca a mìa parìa spiciàli
fòrsi ch’ era sarbàggiu
…ma era naturàli !

Curiùsi nui a taliàri a surd’a’muta
pp’un pèrdiri u mumèntu da mungiùta…

…quann’era l’ura…di fari a firmata
…quann’è ch’era pruiùta na capùta.

U picuraru dava na taliàta
e dopu ca na crapa ava affirrata
(chiddra ca ci parìa a ciò minnùta)
sprimiva li minneddri all’addannàta
ccu sottofondu di la scampaniàta
…ca a crapa mi parìa lumìa sprimùta !

Ogn’e matina…!
sunàva a campana…!  
 pùngìv ‘e spaddri…!
la friscanzàna…! 
 purtava alligrìa…!
‘mmenzu la via…!
u picuraru…!
cca sò cumpagnìa !

Ogn’e matina…
ppi’ colazziòni…
cc’era  spittàculu…
e cosi bbòni…
fumàva u latti….
d’i mìnni sciùtu…
già ‘nzapurùtu…
cottu e vuddrùtu !

Si ‘iva pianu,
…cca tazza ‘nmanu
…e s’aiutava puru all’anzianu…
poi tutti ‘ntavula !      a colazziòni !
…e i nànni dàvinu a binidizziòni !

U pani duru nu latti ammugliàtu..
parìa cosa…di Capi di Statu !!!
Sustànzia e bontà…
cchi cos’e lussu !…
…ca tutti s’alliccàvanu lu mussu !

Attrica acqua lorda e colorànti !
E cosi duci ccu li conserbànti !
Attrica sneck,  cornetti ripieni
…e  lucchinarìi cini di vilèni !

U latti friscu appena mungiùtu
e un tozz’i pan’i’casa già ‘ndurùtu…
cridìtimi carusi…   zòccu sùnnu…
…su’ a megliu colazziòni di lu mùnnu !

Carusi du Domìla
…ccu’ vui co ci cummàtti ?
Vui ‘iti appressu ‘e spot !   …
Ma a mia…mi piàcia u latti !