NUN ERA NATU
Nun era natu e la gran fidi critti,
stetti a lu scuru lu jornu e la notti;
ci stetti novi misi biniditti,
com'è usu di l'autri picciotti;
e stetti 'nda ddi cammiri distritti,
mi calavanu cibi crudi e cotti;
quannu nascivi e a libirtà mi vitti,
cantai e detti liggi a milli dotti.
PETRU DUDDUNI SI PRESENTA
Sutta sti vesti rozzi e pilligrini
si trovanu li cori sparigghiati;
la rosa nasci 'nta puncenti spini,
'nta gerbi terri li gigghia su' nati ;
li petri priziusi e li rubini
'nta li rustichi rocchi li truvati;
chi maraviglia c'è, all'ultimi fini,
si mi viditi sti robbi sfardati?
O PETRA DISPRIZZATA...
O petra disprizzata, opranti mia,
avanti, petra, non ti dubbitari;
si nni lu munnu 'unn'avissimu a tia,
furtizza,'un si putia furtificari;
tu sula , o petra, avisti la valia,
chi cu la petra figuri e cumpari
tu dasti morti a lu giganti 'Ulia,
e facisti Re Saulli triunfari.
Petru cu la petra si struiju,
e Petru cu la petra si campau;
a stissa petra che Petru 'ntagghiau,
un ghiornu pi cummogghiu ci sirviu.
avanti, petra, non ti dubbitari
RITRATTU
Canturi giniali pupulanu,
sprigiudicatu, gran facciazza tosta;
Petru Fudduni lu palermitanu,
avia pì tutti pronta la risposta.
Sfidau in rima e battìu lu Vinizianu
e lu dottu di Tripi, e un detti sosta
a nobili ed a monaci evoluti
chiamannu a tutti buttani e curnuti.
