U SILENZIU RUTTU

Succeri ca ri notti nta la stati

quannu tardu m’arritiru

e finuti su ra festa li gran botti,

mi scialu lu silenziu chinu chinu,

ca u sensiu ri la paci è troppu forti.

Scinnu li scali versu a casa

e viru la biddizza avanti a mia,

chiesi antichi e casi abbrazzati,

stratuzzi ri petra 'ntagghiati,

lustru ca ccu lu scuru fa l’amuri.

Ma quannu juntu sugnu

a du' passi ra mè casa,

stu silenziu maravigghia,

tuttu i corpu veni ruttu,

ca si senti u sonu ri nu cantu.

E’ u vicinu ca durmennu

porti aperti ppi la stati,

runfa bonu e teni bancu,

nu maistru i filastrocca

ca nta notti rapi vucca.

Mischinazzu lu silenziu,

jetta vuci e si lamenta,

ma la notti ci arrispunni

ca u runfari ri lu sonnu

conza i chinu lu vacanti.

E iu prijato ri sta scena,

fazzu lestu ppi durmiri,

ca mmiriusu ro vicinu,

vogghiu trasiri nto sonnu

e attaccari a serra mia!

Fabio Messina

11-8-10 Palazzolo Acreide (SR)