LI NOVI CARUSI SENZA NNOMU

A LA MATRI

PARLA LU CHIU' RANNI

...Unn'angusciàriti si nn'a tòmba 
un c'è u me nnòmu...
ànchi chìstu la sòrti vònzi ppi - nnàntri; 
furtùna ca San - Pètru m'addugà ppi Ancilu 
e ccu du sirbizzèddra lèggi vulànti, 
a- llàusu e rrigàla di Bbiàti e - Ssànti, 
m'a pàssu mègliu di la surfàra...
Ma jè brùttu mòriri a - nnov'annùzzi 
e stàri sènza lu to anèlu... matrùzza bbèddra! 
Li sòrdi di la ggiùsta e di li mànci
ti l'abbìju a - mmànna di lu cèlu; 
chìddri ca sa fàri assupirchjàri 
spènnili a li me fràti a scòli e spìnni 
e - llàssali jucàri stràti stràti, 
nu - llì mannàri a pirrèra a - ttravagliàri, 
jè brùttu abbrusciàti di l'antimòniju 
e - mmòriri scacciàti... 
matrùzza bbèddra! 
Anchi si ccà li spìzziì mi li pàssu 
assulicchiàtu ncàpu la màttula 
accarizzàtu di rràggi d'etèrnu, 
a vemmarìja mi càla l'allammìcu 
e da me stiddrùzza affàcciu la tistùzza:
comu un passarèddru ùrmu di lu civu... 
E - vvidènnu ca mi cèrchi bbramànnu 
ti mànnu ciàu - ciàu e - vvasunèdda ccu - ll'alùzzi 
e - ssèntu li to vràzza strìncimi fòrti 
comu ògni-ssìra ppi la bbonanòtti.